Moporêsidêntê Cyril Ramaphosa o itsisitse ka Mosupologo 23 Mopitlwe 2020 gore naga e tlile go ilêtsa mosepele yo o sa tlhokafaleng go simolola bosigigare, Labone 26 Mopitlwe 2020.
Dipalôpalô tsa mogare wa Corona wa Covid-19 di tsweletse go gola mo Aforika Borwa.
Gompieno 24 Mopitlwe 2020, naga e tsoga palô ya bao ba tshwaêtsêgilêng ka mogare e eme go 554 go tswa go 402 eo naga e neng e eme mo go yona maabane.
Go gola ka lebelô ga dipalô tseno go pateleditse Puso go tsaya ditshwêtso tseo di gagametseng go thibêla kanamô eo e ka felêlêtsang e imetse Lefapha la Boitekanêlô mo nageng.
Dikgatô tseo Puso e di itsisitseng Mosupologo 23 Mopitlwe 2020 ke go ilêtsa mosepele yo o sa tlhokafaleng malatsi a le someamabedi le bongwe (21) go simolola bosigigare Labone 26 Mopitlwe 2020 go fitlha ka Labone 16 Moranang 2020.
Fa a itsise dikgatô tsa sešheng go lwantsha kanamô ya mogare Moporêsidêntê Cyril Ramaphosa o gateletse gore mongwe le mongwe o tshwanetse go dira sengwe le sengwe seo a se kgônang go êfoga kopanô le batho ba bangwe.
Go nna kwa lapeng, go iphapha kwa mafelong a botlhe le go emisa melêtlo ke dikgatô tseo di botlhôkwa go thibêla mogare yono.
Ramaphosa o tlhalositse gore go totobetse fa ba lebêlêtse mokgwa yo mogare o anameng ka ona kwa dinageng tse dingwe gore go tlhôkêga gore naga e tseye dikgatô tseo di gagametseng tse di ikgêtilêng go thibêla matlhôtlhapelo a magolo ao a ka aparêlang naga mo tsamaong ya nako fa Puso e ka se gagamatse dikgatô.
Ke tshwênyêgile gore go ôkêtsêga ka bonako ga ditshwaêtsêgô go tlile go lebisa kwa goreng ditirêlô tsa rona tsa boitekanêlô di imêlwê mme bontsi jwa baagi ga bo kitla bo kgona go fitlhêlêla phôlô eo ba tlileng go e tlhôka. Go botlhôkwa thata gore mongwe le mongwe a sekêgêlê tsebe gotlhêlêlê melawana yotlhe eo e tsêntswêng tirisong go lwantsha kanamô ya mogare yono.
Ramaphosa o gateletse gore fa Puso e ka se tseye dikgatô tseo di gagametseng ebile di ikgêtilê, palô ya bao ba tshwaêtsêgilêng e tlile go ôkêtsêga go tswa go makgolo go ya go dikete di le masome mme e golêle go dikete di le makgolo mo dibêkeng di le mmalwa.
Seno ke kotsi e tona mo nageng ya rona eo e nang le batho ba le bantsi bao masôlê a bona a mmele a leng kwa tlase ka ntlha ya malwetse a HIV le TB go akarêtsa le phêpêlôtlase le tlala.
Go tloga bosigigare ka Labone 26 Mopitlwe 2020 go fitlha Labone 16 Moranang 2020, baagi ba ilêdiwa go tsamaya mesepele eo e sa tlhôkêgeng mme seno ga se akaretse:
- Badiri ba boitekanêlô ba Puso le ba Poraefete
- Badiri ba tsa tshoganyetso
- Bao ba dirang mo maphateng a tshirêlêtso go akaretsa mapodisi, bapharakanô, sesôlê
- Bao ba dirang mo tlamêlông ya dijo ka kakarêtso
- Bao ba dirang kwa bobolokêlông jwa madi
- Bao ba tshwanetseng ba netefatsê tlamêlô ya motlakase, metsi, dikgokaganyô, melemô le ditirêlô tse dingwe tseo di tsêiwang e le tse di botlhôkwa mme go emisiwa ga tsona go ka nna le ditlamorago tseo di sa siamang mo baaging.
Baagi ga ba kitla ba letlêlêlwa go tswa mo malapeng a bona ntle le fa ba ya go bona dingaka, go rêka dijo, ditlhare le go ya go amogêla madi a SASSA.
Ramaphosa o tlhalositse gore Puso e tla tswêlêla go nêêlana ka tshedimosêtso go ya pele tebang le dikgatô tseno.
Kgabagare baagi ba gakololwa go tswêlêla go itlhôkômêla le go tlhapa diatla kgafêtsakgafêtsa go netefatsa fa mogare o sa kgone go anama go feta fa o leng gôna ga jaana.